Giriş yap все шаблоны для dle на сайте newtemplates.ru скачать
 
  • 00:28 – HOPA'DA FABRİKA KURULDU "halk üretiyor, halk işliyor, halk kazanıyor’." 
  • 17:07 – YÖREMİZE ÖZGÜ (Lazca) ARMUT FİDANI ÇEŞİTLERİ DİKİLDİ 
  • 19:23 – BATUM'DA POLİS İLE ÇATIŞTILAR 33 YARALI VAR 
  • 19:14 – 2017 AYDER FESTİVALİ NE ZAMAN YAPILACAK? İŞTE DETAYLAR 
  • 13:23 – LAZCA ÇANAKKALE TÜRKÜSÜ 
  • koltuk yikama


ĞURAŞİ MAGZALEPE

(MENDRA GZAŞİ DESTANİ)

Batumişen Gyonyeşen kagamaxt’es

Varvigzalat gyulvaşa varti atkves

Oxtimuşen çkva çare varuğut’es

E Xasani, e Zelixa, e Cuma.



Sarpişen, Makrialişen, Xopaşen

Kogexedes vapurişa dixaşen

Mzoğa imgars, skele ink’ans ipaşen

İxik bilem nuşols varidan yado

 

Orç’işen, Arkabişen do Vi3’eşen

O3’iamu şignen let’a do n3aşen

Nulvan guriş gverdi dobadonaşen

E Axmati, e Zekiye da-çkimi

 

Ginon syurguni tkvi ginonna gyoçi

Mzaxali, manz’ageri dido k’oçi

Mali mulki, arçkva puci do xoci

Konaşkves do garineri igzales

 

 

Tolepe di3xironi dimç’itanu

Tutasteti vart’u mutu vartanu

Coğorepek lalu dixa ink’anu

Ç’umani diquşi mteli imgart’es

 

Oxori do bak’i naşkves do ides

Neknapemuşiti varti genk’iles

Qonape, golape gurişa gedves

Eşo kogetgit’es ğuraşi gzaşa

Jurşuroni nisa kobra genç’eri

Xçini do badepe ğuras nanç’eri

Ç’it’a berepeti jur sum 3’aneri

E morderi bozo gyuli da-çkimi

 

 

Vapuriş doloxes iç’ves ixales

Mzoğa inçaxu do gurepe akt’es

Z’abunoba moxtu didope cant’es

E Memeti, e şuri cumalepe

 

Kuç’xepemuşis kort’u kalamani

Oçkumet’es Lazepe mani mani

Mi mekabre vana mirt’u duşmani

Varaçkines mutu, eşo igzales

 

Medi uğut’es, mendra gzalepeşen

K’aobati varmulun ndğalepeşen

P’at’işen p’at’i naren xalepeşen

Kodoskides uxelebu do muqvan

 

Vapurişen gextes xarxişi noğas

Ozmonupemuşi naşkves do mzoğas

Varuçkites a3’i dunyas mu iqvas

E Osmani, Dadi-çkimi Xatice

 

Lazepek uk’uibğes do ar gzaşa

Koigzales tamo tamo mendraşa

Seristi dincires çaişa kvaşa

Xvameri gok’u3xes xolo mutu var.

 

Z’abunoba dirdu moxtu k’irğani

Gyari bilem vart’u so z’iran ç’ami

Ar jur ğureliti diqu encami

Meçes ğurelepe xarxişi let’as

 

Eşkiyape moxtu na-nites ar ndğas

Vit Lazi doqviles em gzaşi ortas

A3’i ubabeli berepek muqvas

E p’ap’uli-çkimi, e cumadepe

 

K’at’a ç’umaniren ar jur ğureli

Şuri meçapt’es ç’vini 3’ireli

Salguni z’abunobas mek’ireli

Muepe 3’iruptes şurimşinepek

 

Çkva muç’o nuxondan meşvenu vart’u

Ar mitxanik m3ik’a Sabri qvit u3’u

Mp’oli xyukumetik diqondit ya tkvu

Goşaşeri, goşabğeri doskides

 

Eşo aşo mik’ilu m3ik’a ora

Gza goruptes, kagondunes gyozgira

Duzçe, Akçaşexri, arçkva Marmara

Ağne let’a açkines çkin-Lazepes.
<p style="text-align: left;"> Timur Cumhur P’uliaşi</p>
<p style="text-align: left;"> Mariaşina 2009</p>




Yorum Yaz
Sosyal Ağlarımız
  • Facebook
  • Twitter