Giriş Yap
  Üye Ol!

» » » SALAXANA “GOXTİMONİ


SALAXANA “GOXTİMONİ

SALAXANA "GOXTİMONİ*”
I.
Mç̌imaşi doloxe ar ǯap̌i vort̆i, mp̌ulaşi doloxe bcant̆i. Ťağuni diqinu, mebli, mebli, mebli…Vikti, vikti, mebli…
Ǯip̌!
Titxu tomoni ar biç̌işi tis vort̆i…Axit̆onu. İnçaminuşeni xe iǯozdu…Aǯi mu p̌a? T̆ani domipaşasint̆u! Vimt̆i! Tişen qvaşa, qvaşen tolişi žingişa…Govişaşi, varmafiǩiru; nʒas vort̆i-i var na mzoğa-p̌icis? Sifte govinǩet̆i, oǩule t̆ani-çkimi varmakaçu, gevustvi, gilavixriali…Ğvamuşişi t̆uʒanobaten tusi varviqvaşa, çarbimuşişi ǩunǯulis na ren ç̌it̆a skuis gulaviǩirǩoli.
II.
Let̆a: Qini t̆u.Bcanti. Mendraşen ar sesi moxtu; " Hayde! Kiseli!İgzali!” İzmoce ma do quci varmepçi. Xolo " Kiseli! Igzali!”… 
" Ora varmoxtu” ma.
 " Komoxtu” ya. 
Gop̌ǩuʒxi. Mtini-ti çuçuna t̆u t̆ağuni.  Mutxani xolo noksani t̆u mara mu? Ťağuni çuçuna t̆u, oçişi ora vart̆u. Mu na t̆u gzas visimadamint̆u.
                                        ******
Ǯǩari: Dixaşi tude vort̆i. Goǩuʒxinuşa dido ora t̆u; xeleri blirt̆i. Mʒikaşǩule dixak koxominǩanu; " Hayde! Ora moxtu, kiseli!” ya. Ma ordo ren ya gemaqu mara dixak eşo tku na mtini ren ma. Muşeni ki mogvali kiana çkimden dido uçkit̆u.
            Gzas gebdgiti.
                                                      ******
Nca: Dodgineri bcanti. Ubut̆ǩoni, upukironi ar roǩi… Muşenişǩule kyokepe maxit̆onu. " Aya mu mağoden?” ya do visimadep̌t̆aşa ǯǩarişi sesi vogni;      " Hayde! Ora komoxtu!” ya. Govişaşi. 
           "Ordo varen-i?” ma. Çkimebura duyla varvikip” ya. " Dixa moxtu, gomoǩuʒxinu”
           " ma ordo steri gemaqven mara dixak giǯu na mtini ren” ma.
                                                        ******
Pukiri: Soti vavorti. Ham kianas ar ǯip̌ili ç̌ǩemis-ti varmişapxet̆i. Mara çkimi ora-ti moxtasint̆u, man-ti yepçkindamint̆u…
          Sifte let̆a goǩuʒxu. İdu ǯǩari yoselu. Ǯǩari idu nca goǩuʒxinu. Kyokimuşişen na gyoç̌ǩu, mtel qaepeşi ǩunǯulişakis komoxtu. İp̌t̆i, qaepes ar p̌up̌uzi vort̆i. Ar ǩele xelebaten, ar ǩele-ti şkurinaten gale gamaxtimu pçumert̆i. Ťağuni t̆ibu, t̆ibu…Pix! Ar şvais gale vort̆i.
          Ordo govinǯǩi, miçkin mara ma mutu varp̌i ki, mtelli t̆ağunik gyoç̌ǩapinu.
         Aǯi ar ǩele kianas mevoxosar, ar ǩele-ti variqinas ma do t̆ağunişi tolis gevoǯǩer.
                                                   ******
Ǩoçi: İya…..
          Aya….
          Aǯi…. 
          Ma….
                                                ******
Skidala: Hişt! Hişt! 
 
 
                                                                     Vildan LOKUMCU MANELİŞİ
                                  Marťi  2014 / Bursa
*Goxtimoni: Gezegen ( Not: Bu bir lakap gibi uydurma bir sözcüktür. Sadece tarafımdan, şahsım için kullanılmaktadır) 




3-03-2014, 11:51
  
Konuya yorum yazabilmek için üye olmalısınız. Üye Ol
Yorum Ekle
Ad/Soyad: *
E-Posta: *
Yorumunuz:
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent
Güvenlik Kodu: Okunamayan kodu yenilemek için resmin üstüne tıklayınız
Kodu Yazın: